نصائح لتحسين محركات البحث

نصائح لتحسين محركات البحث

أصحاب الشركات وأي نوع من أنواع البيزنس بيحلموا دايمًا إن مواقعهم الإلكترونية تتصدر نتايج البحث على جوجل. ولكن الموضوع مش بيكون سهل أو بسيط خالص، ولكنه بردو مش مستحيل وممكن يحصل بإتباع شوية نصائح لتحسين محركات البحث أو المعروف بالـ SEO ودة اللي هنعرفك عليه في المقال دة.

يعني إيه تحسين محركات البحث؟ (الـ SEO)

تحسين محركات البحث هو ببساطة اتباع مجموعة خطوات واستراتيجيات للظهور في نتائج البحث الأولية على محركات البحث المختلفة زي جوجل، ياهو، بينج، وغيرهم كتير. في أكتر من طريقة لتحسين محركات البحث ولكن أهمهم هو صياغة المحتوى والكلمات المفتاحية ودول هنتكلم عنهم بالتفصيل. ولكن عشان تتأكد إن طريقة تحسين محركات البحث اللي بتتبعها مظبوطة وفعالة محتاج يكون عندك خبير تحسين محركات البحث أو ما يُسمى بالـ SEO specialist.

إيه هو السيو المحلي؟

تخيل لو بيزور موقعك الإلكتروني آلاف من الزائرين يوميًا ولكن بردو أهدافك مش بتتحقق؟ دة بيكون له عوامل كتير ولكن أهمها هو عدم إتباعك للسيو المحلي. بمعنى تاني، إنك بالفعل بيدخل على موقعك ناس كتير ولكن كلهم مش من نفس البلد اللي انت فيها وبالتالي مش بيشتروا من منتجاتك أو خدماتك لأنها مش مناسبة ليهم. وعشان كدة خبير السيو وجوده مهم لأنه بيقدر يشتغل على تحسين محركات البحث المحلي وبالتالي موقعك يظهر في النتائج الأولية في البلد اللي بتستهدفها.

أهم العوامل المؤثرة في تحسين محركات البحث:

في أكتر من عامل بيأثروا بشكل مباشر في تحسين محركات البحث وترتيب ظهور موقعك في نتائج البحث. لازم تتأكد منهم كلهم وإنهم يكونوا مظبوطين عشان تحصل على أفضل نتيجة وتقدر تتصدر دايمًا محركات البحث. العوامل دي بيكون منها المحتوى المرئي والمكتوب، سهولة إستخدام موقعك وسرعته، إستخدام الكلمات المفتاحية، العناوين وال URL الخاص بيك، مشاكل الـ 404، وعوامل تانية هنتعرف عليها بالتفصيل في السطور اللي جاية.

• جودة المحتوى:
  

كتير من الناس بيفتكروا إن الكلمات المفتاحية وتكرارها بدون هدف هو أهم عامل تحسين محركات البحث، ولكن الحقيقة إن المحتوى يعتبر من أهم عوامل تحسين محركات البحث وعشان كدة محتاج تتأكد إن محتواك بيقدم قيمة ومعلومة حقيقية للمستخدم. ومحتاج تتأكد إن المحتوى مش ممل وبيجذب إنتباه القارئ لأن دة بيساعده إنه يقضي وقت أطول جوا موقعك وبالتالي بيساعد جدًا في تحسين محركات البحث. ولما بنتكلم عن المحتوى فإحنا بنتكلم على المحتوى المكتوب والمرئي وعشان كدة الصور لازم تكون كلها بجودة عالية، ليها علاقة بالمحتوى المكتوب، وبتساعد في في توصيل المعلومة. وطبعًا كل ما كان المحتوى إبداعي كل ما هيفيدك في تحسين محركات البحث لموقعك والظهور في النتائج الأولية بشكل أفضل.

• تجربة سهلة للمستخدم:
  

لما المستخدم بيدخل على موقعك أثناء رحلة بحثه بيكون محتاج معلومة معينة وعايز يوصلها بأسهل طريقة وفي أقل وقت ممكن. عشان كدة ماينفعش يكون موقعك بالنسباله أشبه بالمتاهة اللي مش عارف فيها المفروض يضغط فين ولا عارف يميز المحتوى بتاعك من الإعلانات بسبب كترهم وأماكنهم اللي مش مظبوطة. عشان كدة محتاج تتأكد دايمًا إن موقعك سهل الإستخدام ودة مش بس عشان راحة المستخدم ولكن دة من أهم عوامل تحسين محركات البحث لأن جوجل أو أي محرك بحث تاني بيقيس دة من ضمن العوامل عشان يقرر هل موقعك هيتصدر نتائح البحث الأولية ولا لا. عشان كدة خليك فاكر إنه كل ما كان موقعك سهل وبسيط، كل ما كان تصدرك لنتائج البحث سهل وبسيط.

• الكلمات المفتاحية:
  

كتير من أصحاب البيزنس بيتفكروا إن كل اللي محتاجين يعملوه هو البحث عن أكتر كلمات مفتاحية بيستخدمها المستخدمون خلال رحلة بحثهم ويكرروها بأكبر شكل ممكن في المحتوى وبس! وعشان كدة بيعتقد الكتير منهم إن مهنة خبير السيو أو خبير تحسين محركات البحث مهنة ملهاش لازمة. ولكن في الواقع دة مش حقيقي لأن الفكرة في الكلمات المفتاحية بتكمن في الكيف وليس الكم. بمعنى تاني، مش مهم هتكرر الكلمة المفتاحية كام مرة ولكن المهم هو إختيار الكلمات المفتاحية الصحيحة، وضعها في أماكنها المظبوطة، وإن التكرار دة يكون بيخدم المحتوى وبيوصل الفكرة مش مجرد تكرار من أجل العدد! أما إختيار الكلمات المفتاحية فا هتلاقي كتير من المواقع والأدوات اللي بتساعدك في دة بسهولة وأشهرهم هو Semrush واللي هيديلك نتايج مظبوطة ويخلي شغلك أكتر إحترافية.

• العناوين:
  

كتير من الناس سواء كانوا أصحاب شركات أو صانعين محتوى بيعتقدوا إن إختيار العناوين مش بالأهمية اللي تخليه ياخد وقت فيه أو ينفذه بإتقان ولكن دة طبعًا مش حقيقي. وزي ما بنقول في حاجات كتير فا الجواب دايمًا بيبان من عنوانه عشان كدة عنوانك لازم يكون دقيق وبيوصف محتوى صفحتك من غير ما يكون طويل زيادة عن اللزوم أو مبهم. تخيل لو بتدور على عربية معينة وبعد كتابة إسمها لقيت في النتائج صفحة بعنوان "كتب مفيدة لازم تقراها" أو "صفحة جديدة" أو "المقال التاني" هل هتاخد خطوة بإنك تضغط عليه وتقرأ محتواه؟ أكيد لا ودة بسبب إن أول عنوان مالوش علاقة ببحثك حتى وإن كان المحتوى من الداخل له علاقة بس إزاي هتعرف دة؟ والعنوانين التانيين مبهمين تمامًا ومش بيعبروا عن المحتوى أصلًا وبالتالي مش هتحب تضيع وقتك وتفتحه. عشان كدة العنوان لازم يكون واضح وبيشمل أهم معلومة موجودة في محتواك وكمان يشمل الكلمة المفتاحية الرئيسية. أما بالنسبة للعناوين الفرعية فا لازم تكون واضحة وبسيطة وتكون بحجم أكبر لأن نسبة كبيرة من المستخدمين بيقروا بطريقة الـ skimming أو القراءة السريعة بمعنى إنهم بيقرأوا العناوين فقط ولو حسوا إنهم هيلاقوا المعلومة اللي عايزينها بيبدأوا يقروا التفاصيل.

• معالجة أخطاء الـ 404:
  

أحيانًا بيكون في بعض الصفحات في موقعك فيها أخطاء 404 أو مش شغالة وبتعتقد إن دة مش هيأثر على تحسين محركات البحث أو ظهورك في النتائج الأولية ولكنه بيؤثر عليها بشكل كبير لأكتر من سبب. أولًا إن لو المستخدم قرر يتصفح في موقعك بعد دخوله صفحة معينة وإتفاجيئ بوجود صفحة فيها عطل دة هيديله إنطباع سيء عنك وكمان ممكن يفتكر إن الموقع كله فيه أعطال ويخرج منه وبالتالي هيقضي وقت أقل. دة غير إن أي محرك بحث بيفحص الموقع كله ويتأكد من إنه مناسب وإحترافي عشان يقرر يظهره في النتائج الأولية ووجود الأعطال دي طبعًا هيؤثر على تقييم موقعك.

نصائح لتحسين محركات البحث:

بعد ما عرفت إيه هو محرك البحث ومعنى تحسين محركات البحث والعوامل المؤثرة فيه، محتاج تعرف شوية نصائح تساعدك في تحسين محركات البحث ومحتاج تعرف أهم الحاجات اللي لازم تتفاداها عشان توصل لأحسن نتائج. عشان كدة هنقولك على أهم نصائح لتحسين محركات البحث لموقعك وهم:

• ادرس منافسينك:
  

محتاج دايمًا تعمل تحليل لمنافسينك وتدرسهم كويس جدًا قبل ما تبدأ في أي خطوة جديدة حتى لو الخطوة دي هي كتابة مقال جديد. ودة لأنك لازم تكون فاهم السوق ماشي إزاي، إيه هي الخدمات اللي بيقدمها منافسينك، أسعارها، وكمان إيه هي طريقة كتابتهم والمواضيع اللي بيناقشوها ودة بيساعدك إنك تكون موجود دايمًا وسطهم أو كمان تعلى عنهم وبيساعدك جدًا في تحسين محركات البحث لأنك من خلال التحليل دة بتقدر تعرف إيه أكتر حاجات بيبحث عنها المستخدمين ومهتمين بيها.

• إتأكد أن موقعك يناسب أي جهاز:
  

ساعات كتير بتفتح موقع من على جهاز الكمبيوتر أو اللابتوب وتلاقيه شغال تمام ولكن لو جيت تفتح نفس الموقع من على التليفون بتلاقي إنه متغير وحاجات كتير أوي مش باينة فيه. عشان كدة محتاج دايمًا تتأكد من إنه مناسب لأي حجم شاشة وأي نوع جهاز ودة هيساعدك جدًا في تحسين محركات البحث وإن المستخدم يقضي وقت أطول جوا موقعك.

• تجديد المحتوى بإستمرار:
  

في عصر التكنولوجيا، كل حاجة حوالينا بتتغير بسرعة جدًا عشان كدة لازم تكون مواكب للتغير دة وتتأكد من تجديد المحتوى اللي بتقدمه يوميًا. ودة لأن الظروف الإقتصادية والحياتية بتتغير يوم عن يوم فا لازم يكون محتواك بيواكب الظروف دي وبيتغير معاها عشان يفضل المستخدم طول الوقت حاسس إنك معاه وفاهمه كويس.

• انشر موقعك على مواقع تانية:
  

طبعًا قولنا قبل كدة إن عدد الزيارات على موقعك مهم جدًا لتقييمك عند محركات البحث ومن أهم الطرق اللي هتزود عدد الزيارات دي هي إنك تنشره في مواقع تانية. على سبيل المثال محتاج تعمل صفحة على الفيس بوك وتبدأ تحط لينك موقعك في كل بوست بتنزله عشان تزود عدد الزائرين من غير إعلانات وتكاليف. أو ممكن تبدأ تنشر في مواقع تانية عن طريق إعلانات جوجل واللي هتلاقي شرح تفصيلي عنها هنا.

• زود سرعة موقعك قدر الإمكان:
  

كتير من الناس بتعتقد إن سرعة تحميل الموقع بتكون معتمدة على سرعة الإنترنت الخاص بالمستخدم وعشان كدة كتير من المستخدمين لما بيدخلوا موقع ويلاقوه مش بيحمل بسهولة بيعتقدوا إن الإنترنت الخاص بيهم فيه مشكلة فا بيقرروا يوقفوا تصفح ويخرجوا من الموقع ودة طبعًا بيؤثر على تحسين محركات البحث لموقعك. ولكن الحقيقة إن سرعة التحميل متعلقة كمان بجودة موقعك عشان كدة محتاج دايمًا تتأكد إن موقعك له سرعة تحميل عالية قدر الإمكان وتختبرها بين الحين والآخر.

• حافظ على وجود صفحة خاصة بالأسئلة الأكثر تكرارًا FAQ:
  

ساعات بيكون المحتوى الخاص بيك مفيد جدًا ولكنه مجاوبش على كل التساؤلات اللي في عقل المستخدم عشان كدة بيكون مفيد جدًا إنك تضيف جزء للأسئلة الأكتر تكرارًا وشيوعًا ودة ممكن يكون عن طريق إضافة صفحة منفصلة خاصة بالأسئلة دي أو عن طريق إضافتها كجزء من المحتوى داخل كل صفحة وهنا بيحس المُستخدم إنك بتوفرله كل إحتياجاته وبتكون مصدره وخياره الأول وبيساعدك جدًا في تحسين محركات البحث وتقييم محرك البحث لموقعك.

• حافظ على وجود صفحة للمقالات:
  

كتير من الناس بتعتقد إن الموقع مقتصر على صفحة تعريفية وصفحة للخدمات وصفحة للتواصل وبس كدة خاصًة لو كان موقع بيعرض منتجات في حين إن دة مش صحيح ومش هيفيد تحسين محركات البحث الخاص بيك، وإنما أي خبير تحسين محركات البحث شغله الأساسي بيكون على المقالات. ودة لأن المستخدم بطبعه بيحب يدور ورا كل منتج قبل ما يشتريه عشان كدة بيدخل يبحث عنه ويعرف تفاصيل أكتر عنه وهنا بيجي دور المقالات في إن يكون عندك مقالات متنوعة بتقدملهم كل المعلومات اللي محتاجين يعرفوها وبالتالي زيارات أكتر لموقعك وظهور أكتر في النتائج الأولية.